O casal de Ferreirós

Hai xa bastante tempo que veño ollando ese coche estacionado nese mesmo punto dos arredores do xardin da urbanización, foron pasando as semanas e tamén os meses ata que hai uns dias decidín tirarlle unha foto, máis que nada para probar se facendo pública tal cousa, o concello ten a ben achegarse por aquí có guindastre e retiralo deste sitio, antes deste Renault Safrane tivemos un todo terreo Range Rover, estivo tamén uns cantos meses e ao final desapareceu, descoñezo se foi retirado polo concello ou polo seu dono, que cecais se esquecera onde o tiña estacionado despois dunha noite de excesos, vai ti a saber..

Aqui téde-la foto do vehículo en cuestión, dende aqui queremos chama-la atención da persoa responsable disto no Concello de Poio para que, nun acto de boa vontade propio destas festas de nadal pasen a retiralo, senón pode que remate sendo a vivenda de calqueira indixente ou dun dos moitos yonkis que paran de cando en vez, camiño do Vao, na fonte que hai perto da urbanización, polo de agora xa comeza a ter algún que outro grafitti e xa lle comezan a faltar pezas.

Hoxe entereime dunha magnífica nova, por fin o Concello de Poio estase a adentrar no fabuloso mundo das novas tecnoloxias e da información, o pasado luns era presentada www.concellodepoio.es, un antigo dominio para unha nova web, remodelada e infinitamente mellorada polo que puiden observar nunha primeira toma de contacto que tiven hoxe mesmo.

Pois nada, agardo que a nova web sexa actualizada con relativa frecuencia, sobre todo a axenda de actos que se desenvolven no noso municipio e do que, en moitas ocasións, ninguén se chega a enterar, agora o que si boto de menos é un banner ou ligazón ao Casal de Ferreirós, onde poden consulta-la axenda de actividades que alí se desenvolven, como charlas, exposicións e demais.

¿Xa lle botáchedes unha ollada á nova web? ¿Que vos pareceu en canto a info, navegabilidade e deseño?

Hai uns cantos dias que a nova saltaba aos xornais, aqui tedes un exemplo na Voz de Galicia, o Partido Popular de Javier Dominguez apuntaba directamente á concelleria de cultura e festexos do Concello de Poio como a causante de que o reparto das subvencións aos grupos e colectivos culturais do noso concello non sexan todo o transparente que deberia de ser, dias despois, unha información achegada ao mail deste blogue explicaba un pouco mellor o porqué das sospeitas do Partido Popular local.

Polo que semella, a Escola de Música Tradicional de Poio, de recente creación, leva recibidas xa nos seus escasos tres anos de vida varias subvencións elevadas, estamos a falar de varios millóns das antigas pesetas, o cal particularmente non me parece nada malo, hai que apoia-la música e cultura tradicional, pero a concelleria de cultura ben sabe que en Poio hai outros grupos máis antigos e que na actualidade están traballando case en precario, non hai que ser demasiado espabilado e cando menos si moi obxectivo, para saber que me estou a referir a Vides Novas. Calqueira pode ollar-las condicións nas que esta xente, que semana tras semana e ano tras anos levan traballando por espalla-la nosa cultura pola nosa bisbarra e por todo o territorio galego desenvolven o seu traballo, nunha antiga escola, sen ningún tipo de insonorización, sen calefacción, sen as mínimas condicións para imparti-las clases, e que curran o inconfesable para poderse pagar unhas palletas ou uns pallóns, posto que apenas ninguén lles bota unha man, efectivamente reciben unha subvención do Concello de Poio, pero algo que semella practicamente simbólico se o comparamos coas millonarias achegas que Xose Lois Martinez Blanco, a la postre concelleiro de Cultura e Festexos e tamén presidente da Escola de Música Tradicional (coincidencias desta vida) lles outorga ano tras ano á dita Escola, e que suman xa ao redor dos 40.000 euros, entrementres os de Vides Novas a currar coma condenados para poderse pagar un disco compacto que é a súa ilusión e que lles suporia darse a coñecer, xa non digo a toda Galiza, senón alomenos aos seus veciños e ao mundo da gaita de Poio e bisbarra.

Dende aqui agardamos que a Concelleria de Cultura e Festexos de Poio aplique outra vara de medir no tema das subvencións a grupos folclóricos e asociacións culturais do concello, non pode ser que uns reciban 12.000 € anuais con menos de tres anos de vida, e outros 900 € tendo unha traxectoria de máis de dez anos ás súas costas, e que conste que nin son alumno deles nin teño relacións algunha, que máis quixera eu que saber coller unha gaita ou un tambor na man.

Os usuarios da operadora galega de servizos dixitais R en Poio estamos de noraboa, ou alomenos iso é o que puiden deducir despois de botarlle unha ollada á web www.purafibra.com, onde a compañia informa do aumento de velocidades de subida (upstream) para a nosa zona de Poio, para os que teñades coma min o acceso doméstico de un mega, en cousa duns dias aumentarán esa velocidade a 3 megas, algo que non está nada mal, o que xa non remato de entender é que na web figura que ese aumento progresivo das velocidades será para a zona de A Barca, pero supoño que tamén será efectivo para o resto de vivendas dos arredores, refírome a Ferreirós e Andurique, onde tamén hai usuarios que teñen acceso a internet pola rede de fibra óptica.

Queríavos máis que nada informar, por se a algún de vós inda non vos chegou á casa a cartiña onde vos indican o aumento de velocidades para o vindeiro dia 9 de nadal, asi como os novos combos con chamadas de balde a móbiles e bla,bla,bla.. por certo, non vaiades a pensar que este post está patrocinado por R, nin moito menos, a miña intención somentes é a de informar a tódolos que vivides por aqui e que nuns dias me digades se notáchedes efectivamente o incremento de velocidade ao navegar, e claro, para que iso sexa efectivo teredes que reinicia-lo módem.

Supoño que moito de vós, que sodes veciños desta urbanización ou que visitades a cotío o parque infantil que se ubica no centro da mesma, daríasvos conta de que a pasada semana comezaron por fin as anunciadas obras de mellora e ampliación do mesmo, a dia de hoxe atópase valado e xa comezaron as labouras de ampliación pola parte máis perto da beirarrúa de Antelo e Mariño, no resto do parque están restructurando completamente a distribución dos xogos e mellorando o deseño do mesmo.

Estaredes conmigo en que a foto que fixen o pasado sábado non é de demasiada calidade, tedes razón, foi sacada cun teléfono móbil e ademais dende bastante distancia, era máis que nada para coller unha instantánea do parque en toda a súa extensión, de tódalas maneiras coido que poderedes apreciar os traballos que a empresa HTC está a levar a cabo e como vai tomando forma pouco a pouco, supoño que nuns dias estará todo rematado e e os cativos de toda esta zona de Poio poderán desfrutar e pasalo en grande.

Dende aqui, parabéns ao Concello de Poio pola acertada decisión de amplia-lo parque, por certo, teño as miñas dúbidas se a empresa contratada é HTC ou HPC, nuns sitios ollei unha cousa e noutros outra diferente, e na web da empresa pon HPC.

Por fin o concello de Poio faise eco dunha demanda que os veciños viñamos reclamando dende hai xa bastante tempo, hoxe mesmo saiu nos xornais que o Concello de Poio publicou no Diario Oficial de Galicia, a orde da xunta de governo pola cal se convocan tres novas prazas para o  corpo da policia local, será mediante o sistema de oposición, outra cousa é que esas tres primeiras prazas vaian a ser moi probablemente adxudicadas aos tres policias interinos que hai na actualidade no corpo, por aquilo dos méritos de ter certa antigüidade no concello supoño, polo que conta Luciano Sobral a pretensión municipal é a de contar cun corpo de once axentes para o vindeiro verán, ¡¡ fenomenal, chegarán a tempo para os atascos da Barca !!

Sen tempo non era, o espectacular medre urbanístico e povoacional do noso concello -tede en conta que no último padrón contamos con 18.000 habitantes- non estaba realmente acompañado dunha plantilla de policia local en condicións, nin en efectivos nin en materiais, ademais somos dos poucos (moi poucos) concellos do noso nivel que non teñen un servizo de policia nocturna, e coa que está caendo con asaltos a casas e demais. Agardo que nun futuro máis ben próximo, a local de Poio se deixe caer máis a miúdo pola nosa zona, non estaría mal un garbeo de cando en vez polos arredores da urbanización, principalmente os venres e sábados pola noite diante do colexio de Viñas, porque hai moita rapazada facendo o indio cós coches e coa música a todo meter, e logo veñen as lamentacións..

Có gallo da conmemoración o vindeiro 25 de novembro do dia internacional para a eliminación da violencia de xénero, terán lugar diversos actos no noso concello, de entre eles destaco unha exposición que terá lugar no Casal de Ferreirós.

Baixo o nome de No solo duelen los golpes, este venres dia 21 poderemos ollar esta mostra que foi cedida pola plataforma contra os malos tratos á muller de Málaga (Violencia Cero), tamén o dia 25 terá lugar unha concentración ás portas da casa do concello a partires das 12 do mediodía, na cal posteriormente leerase un manifesto en contra do maltrato ás mulleres.

Supoño que non seremo-los únicos en todo o concello aos que lles acontece isto, tamén os nosos veciños de Pontevedra teñen aturado colectores de cartón cheos ata os topes ao longo de dias, incluso de semanas, ao final todo remata ciscado polo chan senón queimado como ten ocorrido en máis dunha ocasión. É precisamente diso do que vos queria falar, de que un dos dous únicos colectores de cartón e papel que temos para toda a nosa urbanización leva cheo xa uns cantos dias, e de que as bolsas con caixas de pizzas, packs de cervexas e demais comezan a agromar polo chan ao seu redor, có conseguinte perigo para a circulación e tamén para o noso orgullo coma veciños, porque ollar todo iso amoreado no chan non deixa de ser un espectáculo triste e lamentable, senón ollade a foto que saquei no dia de onte (10-11-08).

Supoño que o tema da recollida selectiva será cousa da xente de Cespa, os cales dependen coma non do concello de Poio, pois unha vez máis dámoslle un toque de atención ao señor Agís para que preste atención a estes “pequenos detalles”, a limpeza do noso entorno é algo máis que importante, diria que básico, alomenos para nós os veciños e veciñas desta zona, que coma todo o mundo abonamos relixiosamente o recibo trimestral e temos dereito a queixarnos senón obtemos un servizo acorde có prezo que pagamos.

Dende aqui tamén aproveito para comentarlle a tódolos meus veciños que, os brick’s de leite non van no colector do cartón e papel, senón no amarelo, para envases de metal, plástico e tipo brick (que conteñen aluminio) e que por favor non sexan tan cómodos e baixen o lixo os domingos pola mañá ou mesmo no coche, baixando por dirección prohibida ata chegar aos colectores de lixo, que ten tela o asunto.

EDITADO: HOXE DIA 13/11/2008 O COLECTOR DE CARTÓN E PAPEL DO QUE FALABAMOS HAI DIAS FOI VALEIRADO POR FIN, AGARDEMOS QUE A PARTIRES DE AGORA REALICEN ISTO CON MÁIS ASIDUIDADE.

Quén sabe, cecais o feito de dispor dun blogue no que denunciar e demandar melloras para a zona de Ferreirós e arredores poida servir para algo, tamén pode ser que estas denuncias cheguen a oidos/ollos do noso concello e por ahí poidamos acadar unha pronta resolución dos nosos problemas, de ser asi entón o noso traballo pagaría a pena certamente.

O feito é que, a finais do pasado mes de novembro, publicaba este artigo no que denunciaba entre outras cousas, o problema que tiñamos os peatóns cun seto propiedade de Urbis, o seto en cuestión invadia a beirarrúa e dificultaba o paso dende hai perto dun ano, a foto fora proporcionada por Luis Hermelo, un veciño da zona que tamén lle notificara isto mesmo ao concello sen resposta nin pola súa parte nin pola da inmobiliaria. Pois ben, hai cousa duns dias que este problema foi por fin resolto, non sei se foi o Concello de Poio ou Urbis os recortaron o susodicho seto (tampouco era unha obra de enxeñeria o que habia que facer) pero si que agora podemos circular con total liberdade por ese treito da beirarrúa, e senón comparade as fotos de hoxe e de hai un ano.

Asi que sexa quén fora o que por fin resolveu este problema, moitas gracias.

Segundo puiden ollar nesta nova que atopei hai un par de dias pero que foi publicada hai máis dun mes, a empresa HTC será a encargada da ampliación do parque infantil da nosa urbanización do Pazo de Ferreirós.

Segundo un acordo polo cal o Concello de Poio achegará perto de oito millóns das antigas pesetas, a tenente de alcalde Chelo Besada anunciou que o parque será ampliado en breve, para que asi os cativos da nosa urbanización poidan desfrutar dun espazo de xogo e desfrute do doble de extensión que o actual. Se vos fixades na data de publicación, hai un mes que foi decidido e inda non ollei nada de movemento por alí, agardemos pois que comecen canto antes para que asi os rapaces poidan desfrutar do parque ampliado e mellorado nas vindeiras vacacións de nadal. Polo que a min respecta, so me resta darlle-los parabéns ao concello, a povoación da urbanización medra dia a dia e cada vez son máis rapaces os que xogan naquel parque que xa estaba a ficar pequeno de máis.

Agora agardemos que tamén teñan conta do resto do entorno, bombillas fundidas, bancos sen atornillar ao chán, papeleiras insuficientes…